ਯੂਰਪੀ ਸੰਘ ਨੇ ਅਮਰੀਕੀ ਟੈਰਿਫਾਂ ਦੇ ਤਹਿਤ ਆਪਣੇ ਨਵੇਂ ਜਵਾਬੀ ਟੈਰਿਫਾਂ ਨੂੰ ਕੁਝ ਸਮੇਂ ਲਈ ਕੀਤਾ ਮੁਲਤਵੀ
ਯੂਰਪੀਅਨ ਕਮਿਸ਼ਨ ਦੀ ਪ੍ਰਧਾਨ ਉਰਸੁਲਾ ਵਾਨ ਡੇਰ ਲੇਅਨ ਨੇ ਐਲਾਨ ਕੀਤਾ ਹੈ ਕਿ ਅਮਰੀਕੀ ਨਿਰਯਾਤ 'ਤੇ ਯੂਰਪੀ ਸੰਘ ਦੇ ਜਵਾਬੀ ਟੈਰਿਫਾਂ ਵਿੱਚ ਫਿਰ ਦੇਰੀ ਹੋ ਗਈ ਹੈ।
ਜਵਾਬੀ ਟੈਰਿਫ, ਜੋ ਮੰਗਲਵਾਰ ਤੋਂ ਸ਼ੁਰੂ ਹੋਣ ਵਾਲੇ ਸਨ, ਇਹ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਸਟੀਲ ਅਤੇ ਐਲੂਮੀਨੀਅਮ 'ਤੇ ਸ਼ੁਰੂਆਤੀ ਆਯਾਤ ਟੈਕਸਾਂ ਦੇ ਜਵਾਬ ਵਿੱਚ ਲਗਾਏ ਜਾਣੇ ਸਨ।
ਯੂਰਪੀ ਸੰਘ ਦੀ ਜਵਾਬੀ ਕਾਰਵਾਈ, ਜੋ ਕਿ €21 ਬਿਲੀਅਨ ਦੇ ਅਮਰੀਕੀ ਸਮਾਨ ਨੂੰ ਪ੍ਰਭਾਵਿਤ ਕਰਦੀ ਸੀ, ਨੂੰ ਪਹਿਲਾਂ ਮਾਰਚ ਵਿੱਚ ਮੁਅੱਤਲ ਕਰ ਦਿੱਤਾ ਗਿਆ ਸੀ। ਵੌਨ ਡੇਰ ਲੇਅਨ ਨੇ ਐਤਵਾਰ ਨੂੰ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਦੱਸਿਆ ਕਿ ਇਸ ਰੋਕ ਨੂੰ ਅਗਸਤ ਦੇ ਸ਼ੁਰੂ ਤੱਕ ਵਧਾ ਦਿੱਤਾ ਗਿਆ ਹੈ।
ਯੂਰਪੀ ਸੰਘ ਦੇ ਵਪਾਰ ਮੰਤਰੀਆਂ ਦੇ ਸੋਮਵਾਰ ਨੂੰ ਬ੍ਰੁਸੇਲਜ਼ ਵਿੱਚ ਮਿਲਣ ਦੀ ਉਮੀਦ ਹੈ ਤਾਂ ਜੋ ਇਸ ਬਾਰੇ ਚਰਚਾ ਕੀਤੀ ਜਾ ਸਕੇ ਕਿ ਕੀ ਜਵਾਬੀ ਕਾਰਵਾਈ ਕਰਨੀ ਚਾਹੀਦੀ ਹੈ।
ਇਹ ਕਦਮ ਟਰੰਪ ਵੱਲੋਂ 1 ਅਗਸਤ ਤੋਂ ਯੂਰਪੀ ਸੰਘ ਦੇ ਆਯਾਤ 'ਤੇ 30% ਟੈਰਿਫ ਲਗਾਉਣ ਦੀਆਂ ਆਪਣੀਆਂ ਯੋਜਨਾਵਾਂ ਦਾ ਐਲਾਨ ਕਰਦੇ ਹੋਏ ਵੌਨ ਡੇਰ ਲੇਅਨ ਨੂੰ ਇੱਕ ਪੱਤਰ ਲਿਖਣ ਤੋਂ ਬਾਅਦ ਆਇਆ ਹੈ।
ਟਰੰਪ ਨੇ ਚੇਤਾਵਨੀ ਦਿੱਤੀ ਕਿ ਜੇਕਰ ਵਪਾਰਕ ਭਾਈਵਾਲਾਂ ਨੇ ਅਮਰੀਕਾ ਵਿਰੁੱਧ ਆਪਣੇ ਖੁਦ ਦੇ ਆਯਾਤ ਡਿਊਟੀਆਂ ਨਾਲ ਬਦਲਾ ਲਿਆ, ਤਾਂ ਉਹ 30% ਤੋਂ ਵੱਧ ਟੈਰਿਫ ਵਧਾ ਕੇ ਜਵਾਬੀ ਹਮਲਾ ਕਰੇਗਾ।
ਸ਼ਨੀਵਾਰ ਰਾਤ ਨੂੰ ਪ੍ਰਸਾਰਿਤ ਹੋਏ ਫੌਕਸ ਨਿਊਜ਼ ਨਾਲ ਇੱਕ ਪਹਿਲਾਂ ਤੋਂ ਰਿਕਾਰਡ ਕੀਤੇ ਇੰਟਰਵਿਊ ਵਿੱਚ, ਟਰੰਪ ਨੇ ਕਿਹਾ ਕਿ ਕੁਝ ਦੇਸ਼ "ਹੁਣ ਬਹੁਤ ਪਰੇਸ਼ਾਨ" ਹਨ ਪਰ ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਟੈਰਿਫ ਦਾ ਮਤਲਬ ਹੈ "ਸੈਂਕੜੇ ਅਰਬ ਡਾਲਰ" ਆ ਰਹੇ ਹਨ।
ਵੌਨ ਡੇਰ ਲੇਅਨ ਨੇ ਐਤਵਾਰ ਨੂੰ ਪੱਤਰਕਾਰਾਂ ਨੂੰ ਦੱਸਿਆ: "ਸੰਯੁਕਤ ਰਾਜ ਅਮਰੀਕਾ ਨੇ ਸਾਨੂੰ ਇੱਕ ਪੱਤਰ ਭੇਜਿਆ ਹੈ ਜਿਸ ਵਿੱਚ ਟੈਰਿਫ ਲਾਗੂ ਹੋਣ ਬਾਰੇ ਲਿਖਿਆ ਗਿਆ ਹੈ ਜਦੋਂ ਤੱਕ ਕੋਈ ਗੱਲਬਾਤ ਵਾਲਾ ਹੱਲ ਨਹੀਂ ਨਿਕਲਦਾ, ਇਸ ਲਈ ਅਸੀਂ ਵੀ ਆਪਣੇ ਜਵਾਬੀ ਟੈਰਿਫਾਂ ਦੀ ਮੁਅੱਤਲੀ ਨੂੰ ਅਗਸਤ ਦੇ ਸ਼ੁਰੂ ਤੱਕ ਵਧਾ ਦੇਵਾਂਗੇ।
"ਇਸ ਦੇ ਨਾਲ ਹੀ, ਅਸੀਂ ਜਵਾਬੀ ਉਪਾਵਾਂ ਲਈ ਤਿਆਰੀ ਜਾਰੀ ਰੱਖਾਂਗੇ ਤਾਂ ਜੋ ਅਸੀਂ ਪੂਰੀ ਤਰ੍ਹਾਂ ਤਿਆਰ ਰਹੀਏ।"
ਯੂਰਪੀਅਨ ਕਮਿਸ਼ਨ ਦੇ ਪ੍ਰਧਾਨ ਨੇ ਜ਼ੋਰ ਦੇ ਕੇ ਕਿਹਾ ਕਿ ਯੂਰਪੀਅਨ ਯੂਨੀਅਨ ਹਮੇਸ਼ਾ ਬਹੁਤ ਸਪੱਸ਼ਟ ਰਹੀ ਹੈ ਕਿ ਅਸੀਂ ਗੱਲਬਾਤ ਵਾਲੇ ਹੱਲ ਨੂੰ ਤਰਜੀਹ ਦਿੰਦੇ ਹਾਂ। ਉਸਨੇ ਅੱਗੇ ਕਿਹਾ, "ਹੁਣ ਇਹ ਮਾਮਲਾ ਗੰਭੀਰ ਬਣਿਆ ਹੋਇਆ ਹੈ, ਅਤੇ ਅਸੀਂ 1 ਅਗਸਤ ਤੱਕ ਸਾਡੇ ਕੋਲ ਜੋ ਸਮਾਂ ਹੈ ਉਸ ਦੀ ਵਰਤੋਂ ਕਰਾਂਗੇ।"
ਜਰਮਨੀ ਦੇ ਵਿੱਤ ਮੰਤਰੀ ਲਾਰਸ ਕਲਿੰਗਬੇਲ ਨੇ ਐਤਵਾਰ ਨੂੰ ਕਿਹਾ ਕਿ ਅਮਰੀਕਾ ਨਾਲ "ਗੰਭੀਰ ਅਤੇ ਹੱਲ-ਮੁਖੀ ਗੱਲਬਾਤ" ਅਜੇ ਵੀ ਜ਼ਰੂਰੀ ਹੈ, ਪਰ ਇਹ ਵੀ ਕਿਹਾ ਕਿ ਜੇਕਰ ਉਹ ਅਸਫਲ ਰਹਿੰਦੇ ਹਨ, ਤਾਂ ਯੂਰਪੀਅਨ ਯੂਨੀਅਨ ਨੂੰ "ਯੂਰਪ ਵਿੱਚ ਨੌਕਰੀਆਂ ਅਤੇ ਕਾਰੋਬਾਰਾਂ ਦੀ ਰੱਖਿਆ ਲਈ ਫੈਸਲਾਕੁੰਨ ਜਵਾਬੀ ਉਪਾਅ" ਦੀ ਜ਼ਰੂਰਤ ਹੋਏਗੀ।
ਕਲਿੰਗਬੇਲ ਨੇ ਰੋਜ਼ਾਨਾ ਅਖ਼ਬਾਰ ਸੁਡੈਸ਼ ਜ਼ਾਈਟੁੰਗ ਨੂੰ ਦੱਸਿਆ, "ਸਾਡੇ ਹੱਥ ਆਊਟਸਟਰੈਚਡ ਹਨ ਪਰ ਅਸੀਂ ਕੁਝ ਵੀ ਏਦਾਂ ਹੀ ਸਵੀਕਾਰ ਨਹੀਂ ਕਰਾਂਗੇ।"
ਉਨ੍ਹਾਂ ਦੀਆਂ ਟਿੱਪਣੀਆਂ ਉਸ ਸਮੇਂ ਆਈਆਂ ਜਦੋਂ ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਨੇ ਸ਼ਨੀਵਾਰ ਨੂੰ ਯੂਰਪੀਅਨ ਕਮਿਸ਼ਨ - ਜੋ ਕਿ ਸਾਰੇ ਯੂਰਪੀਅਨ ਯੂਨੀਅਨ ਦੇਸ਼ਾਂ ਵੱਲੋਂ ਗੱਲਬਾਤ ਕਰਦਾ ਹੈ - ਨੂੰ "ਯੂਰਪੀਅਨ ਹਿੱਤਾਂ ਦੀ ਪੂਰੀ ਤਰ੍ਹਾਂ ਰੱਖਿਆ" ਕਰਨ ਦੀ ਅਪੀਲ ਕੀਤੀ।
ਸ਼ਨੀਵਾਰ ਤੱਕ, ਟਰੰਪ ਪ੍ਰਸ਼ਾਸਨ ਨੇ ਹੁਣ 24 ਦੇਸ਼ਾਂ ਅਤੇ ਯੂਰਪੀਅਨ ਯੂਨੀਅਨ ਜੋ ਕਿ 27 ਦੇਸ਼ਾਂ ਤੋਂ ਬਣਿਆ ਹੈ, 'ਤੇ ਟੈਰਿਫ ਸ਼ਰਤਾਂ ਦਾ ਪ੍ਰਸਤਾਵ ਰੱਖਿਆ ਹੈ।
12 ਅਪ੍ਰੈਲ ਨੂੰ, ਵ੍ਹਾਈਟ ਹਾਊਸ ਦੇ ਵਪਾਰ ਸਲਾਹਕਾਰ ਪੀਟਰ ਨਵਾਰੋ ਨੇ "90 ਦਿਨਾਂ ਵਿੱਚ 90 ਸੌਦੇ" ਕਰਨ ਦਾ ਟੀਚਾ ਰੱਖਿਆ ਹੈ। ਹੁਣ ਤੱਕ, ਰਾਸ਼ਟਰਪਤੀ ਨੇ ਯੂਨਾਈਟਿਡ ਕਿੰਗਡਮ ਅਤੇ ਵੀਅਤਨਾਮ ਨਾਲ ਦੋ ਅਜਿਹੇ ਸਮਝੌਤਿਆਂ ਦੀ ਰੂਪ-ਰੇਖਾ ਦਾ ਐਲਾਨ ਕੀਤਾ ਹੈ ਕਿਉਂਕਿ ਦੂਜਿਆਂ ਨਾਲ ਅਜੇ ਗੱਲਬਾਤ ਜਾਰੀ ਹੈ।
