ਟਰੰਪ ਨੇ ਬ੍ਰਾਜ਼ੀਲ ਤੇ 50% ਟੈਰਿਫ ਦੀ ਧਮਕੀ ਦਿੱਤੀ ਅਤੇ ਬੋਲਸੋਨਾਰੋ ਦੇ ਮੁਕੱਦਮੇ ਨੂੰ ਖਤਮ ਕਰਨ ਦੀ ਕੀਤੀ ਮੰਗ

ਉਨ੍ਹਾਂ ਨੇ ਆਪਣੇ ਨਵੀਨਤਮ ਟੈਰਿਫ ਪੱਤਰ ਵਿੱਚ ਇਸ ਯੋਜਨਾ ਦਾ ਐਲਾਨ ਕੀਤਾ, ਜੋ ਸੋਸ਼ਲ ਮੀਡੀਆ 'ਤੇ ਸਾਂਝਾ ਕੀਤਾ ਗਿਆ ਸੀ।

ਇਸ ਵਿੱਚ, ਟਰੰਪ ਨੇ ਬ੍ਰਾਜ਼ੀਲ 'ਤੇ ਅਮਰੀਕੀ ਤਕਨੀਕੀ ਕੰਪਨੀਆਂ 'ਤੇ ਹਮਲਿਆਂ ਅਤੇ ਸਾਬਕਾ ਰਾਸ਼ਟਰਪਤੀ ਜੈਅਰ ਬੋਲਸੋਨਾਰੋ ਵਿਰੁੱਧ ਮੁਕੱਦਮਾ ਕਰਨ ਦਾ ਦੋਸ਼ ਲਗਾਇਆ ਹੈ, ਜੋ 2022 ਦੀਆਂ ਚੋਣਾਂ ਦੇ ਨਤੀਜਿਆਂ ਨੂੰ ਬਦਲਣ ਦੀ ਸਾਜ਼ਿਸ਼ ਵਿੱਚ ਆਪਣੀ ਕਥਿਤ ਭੂਮਿਕਾ ਲਈ ਮੁਕੱਦਮੇ ਦਾ ਸਾਹਮਣਾ ਕਰ ਰਹੇ ਹਨ।

ਇੱਕ ਸੋਸ਼ਲ ਮੀਡੀਆ ਪੋਸਟ ਵਿੱਚ ਜਵਾਬ ਦਿੰਦੇ ਹੋਏ, ਬ੍ਰਾਜ਼ੀਲ ਦੇ ਰਾਸ਼ਟਰਪਤੀ ਲੁਈਜ਼ ਇਨਾਸੀਓ ਲੂਲਾ ਡਾ ਸਿਲਵਾ ਨੇ ਕਿਹਾ ਕਿ ਬ੍ਰਾਜ਼ੀਲ 'ਤੇ ਟੈਰਿਫ ਵਿੱਚ ਵਾਧੇ ਦਾ ਬਦਲਾ ਲਿਆ ਜਾਵੇਗਾ, ਅਤੇ ਉਨ੍ਹਾਂ ਨੇ ਦੇਸ਼ ਦੀ ਨਿਆਂਇਕ ਪ੍ਰਣਾਲੀ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਦਖਲਅੰਦਾਜ਼ੀ ਵਿਰੁੱਧ ਟਰੰਪ ਨੂੰ ਚੇਤਾਵਨੀ ਦਿੱਤੀ ਹੈ।

ਟਰੰਪ ਨੇ ਇਸ ਹਫ਼ਤੇ ਦੇ ਸ਼ੁਰੂ ਵਿੱਚ ਬੋਲਸੋਨਾਰੋ ਦੇ ਮੁਕੱਦਮੇ ਬਾਰੇ ਲੂਲਾ ਡਾ ਸਿਲਵਾ ਨਾਲ ਵੀ ਬਹਿਸ ਕੀਤੀ ਸੀ। ਉਸ ਸਮੇਂ, ਲੂਲਾ ਡੀ ਸਿਲਵਾ ਨੇ ਕਿਹਾ ਕਿ ਬ੍ਰਾਜ਼ੀਲ ਕਿਸੇ ਦੀ ਵੀ "ਦਖਲਅੰਦਾਜ਼ੀ" ਸਵੀਕਾਰ ਨਹੀਂ ਕਰੇਗਾ ਅਤੇ ਕਿਹਾ ਕਿ "ਕੋਈ ਵੀ ਕਾਨੂੰਨ ਤੋਂ ਉੱਪਰ ਨਹੀਂ ਹੈ।"

ਬੁੱਧਵਾਰ ਨੂੰ ਟਰੰਪ ਨੇ ਕਿਹਾ ਕਿ ਤਾਂਬੇ ਦੇ ਇੰਪੋਰਟ 'ਤੇ 50% ਟੈਰਿਫ, ਜਿਸਦਾ ਉਨ੍ਹਾਂ ਨੇ ਇਸ ਹਫ਼ਤੇ ਦੇ ਸ਼ੁਰੂ ਵਿੱਚ ਐਲਾਨ ਕੀਤਾ ਸੀ, 1 ਅਗਸਤ ਤੋਂ ਲਾਗੂ ਹੋਵੇਗਾ।

ਉਨ੍ਹਾਂ ਨੇ ਇੱਕ ਸੋਸ਼ਲ ਮੀਡੀਆ ਪੋਸਟ ਵਿੱਚ ਕਿਹਾ ਕਿ ਇਹ ਫੈਸਲਾ ਰਾਸ਼ਟਰੀ ਸੁਰੱਖਿਆ ਚਿੰਤਾਵਾਂ ਦੇ ਕਾਰਨ ਲਿਆ ਗਿਆ ਹੈ।

ਟਰੰਪ ਨੇ ਇਸ ਹਫ਼ਤੇ ਦੁਨੀਆ ਭਰ ਦੇ ਦੇਸ਼ਾਂ ਨੂੰ 22 ਪੱਤਰ ਪੋਸਟ ਕੀਤੇ ਹਨ, ਜਿਨ੍ਹਾਂ ਵਿੱਚ ਜਾਪਾਨ, ਦੱਖਣੀ ਕੋਰੀਆ ਅਤੇ ਸ਼੍ਰੀਲੰਕਾ ਵਰਗੇ ਵਪਾਰਕ ਭਾਈਵਾਲ ਸ਼ਾਮਲ ਹਨ, ਜਿਸ ਵਿੱਚ ਉਨ੍ਹਾਂ ਦੇ ਸਾਮਾਨ 'ਤੇ ਨਵੇਂ ਟੈਰਿਫਾਂ ਦੀ ਰੂਪਰੇਖਾ ਦਿੱਤੀ ਹੈ ਜੋ ਉਨ੍ਹਾਂ ਦਾ ਕਹਿਣਾ ਹੈ ਕਿ 1 ਅਗਸਤ ਤੋਂ ਲਾਗੂ ਹੋਣਗੇ।

ਇਨ੍ਹਾਂ ਕਦਮਾਂ ਨੇ ਅਪ੍ਰੈਲ ਵਿੱਚ ਟਰੰਪ ਦੁਆਰਾ ਪੇਸ਼ ਕੀਤੀਆਂ ਗਈਆਂ ਯੋਜਨਾਵਾਂ ਨੂੰ ਮੁੜ ਸੁਰਜੀਤ ਕਰਨ ਲਈ ਵੱਡੇ ਪੱਧਰ 'ਤੇ ਕੰਮ ਕੀਤਾ ਹੈ, ਪਰ ਵਿੱਤੀ ਬਾਜ਼ਾਰਾਂ ਤੇ ਕਾਫੀ ਸਖਤ ਪ੍ਰਭਾਵ ਪੈਣ ਕਾਰਨ ਇਨ੍ਹਾਂ ਨੂੰ ਰੋਕ ਦਿੱਤਾ ਗਿਆ ਸੀ।

ਪਰ ਬ੍ਰਾਜ਼ੀਲ ਨੂੰ ਪੱਤਰ ਵਿੱਚ ਦੱਸਿਆ ਗਿਆ ਹੈ ਕਿ ਦੇਸ਼ ਤੋਂ ਆਉਣ ਵਾਲੇ ਸਾਮਾਨਾਂ 'ਤੇ ਪਹਿਲਾਂ ਐਲਾਨੇ ਗਏ 10% ਟੈਰਿਫ ਨਾਲੋਂ ਹੁਣ ਕਿਤੇ ਵੱਧ ਮਹੱਤਵਪੂਰਨ ਵਾਧੇ ਦੀ ਧਮਕੀ ਦਿੱਤੀ ਗਈ ਹੈ।

ਕਈ ਹੋਰ ਦੇਸ਼ਾਂ ਦੇ ਉਲਟ, ਅਮਰੀਕਾ ਨੇ ਪਿਛਲੇ ਸਾਲ ਬ੍ਰਾਜ਼ੀਲ ਨਾਲ ਟਰੇਡ ਸਰਪਲੱਸ ਦਾ ਆਨੰਦ ਮਾਣਿਆ, ਭਾਵ ਅਮਰੀਕਾ ਨੇ ਬ੍ਰਾਜੀਲ ਤੋਂ ਖਰੀਦੇ ਗਏ ਸਮਾਨ ਨਾਲੋਂ ਵੱਧ ਸਾਮਾਨ ਉੱਥੇ ਵੇਚਿਆ।

ਟਰੰਪ ਨੇ ਪੱਤਰ ਵਿੱਚ, ਬ੍ਰਾਜ਼ੀਲ ਸਰਕਾਰ 'ਤੇ ਨਿਰਪੱਖ ਚੋਣਾਂ 'ਤੇ ਧੋਖੇਬਾਜ਼ ਹਮਲੇ, ਅਤੇ ਅਮਰੀਕੀਆਂ ਦੇ ਬੁਨਿਆਦੀ ਆਜ਼ਾਦੀ ਦੇ ਭਾਸ਼ਣ ਅਧਿਕਾਰਾਂ ਤੇ ਰੋਕ ਦਾ ਦੋਸ਼ ਲਗਾਇਆ, ਜਿਸ ਵਿੱਚ "ਯੂਐਸ ਸੋਸ਼ਲ ਮੀਡੀਆ ਪਲੇਟਫਾਰਮਾਂ" ਦੀ ਸੈਂਸਰਸ਼ਿਪ ਸ਼ਾਮਲ ਹੈ।

ਟਰੰਪ ਦੀ ਸੋਸ਼ਲ ਮੀਡੀਆ ਕੰਪਨੀ- ਟਰੰਪ ਮੀਡੀਆ, ਸੋਸ਼ਲ ਮੀਡੀਆ ਖਾਤਿਆਂ ਨੂੰ ਮੁਅੱਤਲ ਕਰਨ ਦੇ ਆਦੇਸ਼ਾਂ 'ਤੇ ਬ੍ਰਾਜ਼ੀਲ ਦੀ ਅਦਾਲਤ ਦੇ ਫੈਸਲੇ ਵਿਰੁੱਧ ਲੜ ਰਹੀਆਂ ਅਮਰੀਕੀ ਤਕਨੀਕੀ ਕੰਪਨੀਆਂ ਵਿੱਚੋਂ ਇੱਕ ਹੈ।

ਦੇਸ਼ ਨੇ ਐਲੋਨ ਮਸਕ ਦੇ ਐਕਸ, ਜਿਸਨੂੰ ਪਹਿਲਾਂ ਟਵਿੱਟਰ ਵਜੋਂ ਜਾਣਿਆ ਜਾਂਦਾ ਸੀ, ਤੇ ਵੀ ਅਸਥਾਈ ਤੌਰ 'ਤੇ ਪਾਬੰਦੀ ਲਗਾ ਦਿੱਤੀ ਸੀ, ਕਿਉਂਕਿ ਪਲੇਟਫਾਰਮ ਨੇ ਉਨ੍ਹਾਂ ਖਾਤਿਆਂ 'ਤੇ ਪਾਬੰਦੀ ਲਗਾਉਣ ਤੋਂ ਇਨਕਾਰ ਕਰ ਦਿੱਤਾ ਸੀ ਜਿਨ੍ਹਾਂ ਨੂੰ ਬ੍ਰਾਜ਼ੀਲ ਦੁਆਰਾ 2022 ਬ੍ਰਾਜ਼ੀਲੀਅਨ ਰਾਸ਼ਟਰਪਤੀ ਚੋਣ ਬਾਰੇ ਗਲਤ ਜਾਣਕਾਰੀ ਫੈਲਾਉਣ ਵਾਲੇ ਸਮਝਿਆ ਜਾਂਦਾ ਸੀ।

ਪਿਛਲੇ ਮਹੀਨੇ, ਬ੍ਰਾਜ਼ੀਲ ਦੀ ਸੁਪਰੀਮ ਕੋਰਟ ਨੇ ਫੈਸਲਾ ਸੁਣਾਇਆ ਸੀ ਕਿ ਸੋਸ਼ਲ ਮੀਡੀਆ ਕੰਪਨੀਆਂ ਨੂੰ ਉਨ੍ਹਾਂ ਦੇ ਪਲੇਟਫਾਰਮਾਂ 'ਤੇ ਪੋਸਟ ਕੀਤੀ ਗਈ ਸਮੱਗਰੀ ਲਈ ਜ਼ਿੰਮੇਵਾਰ ਠਹਿਰਾਇਆ ਜਾ ਸਕਦਾ ਹੈ।

ਆਪਣੇ ਪੱਤਰ ਵਿੱਚ, ਟਰੰਪ ਨੇ ਬ੍ਰਾਜ਼ੀਲ ਦੇ ਸਾਬਕਾ ਰਾਸ਼ਟਰਪਤੀ ਬੋਲਸੋਨਾਰੋ ਬਾਰੇ ਵੀ ਗੱਲ ਕੀਤੀ, ਕਿਹਾ ਕਿ ਉਹ "ਉਨ੍ਹਾਂ ਦਾ ਬਹੁਤ ਸਤਿਕਾਰ ਕਰਦੇ ਸਨ"। ਉਸਨੇ ਅੱਗੇ ਕਿਹਾ ਕਿ ਉਸਦੇ ਵਿਰੁੱਧ ਚੱਲ ਰਿਹਾ ਮੁਕੱਦਮਾ "ਇੱਕ ਅੰਤਰਰਾਸ਼ਟਰੀ ਅਪਮਾਨ" ਹੈ।

ਟਰੰਪ ਨੇ ਰੀਓ ਡੀ ਜਨੇਰੀਓ ਵਿੱਚ ਬ੍ਰਿਕਸ ਸੰਮੇਲਨ ਦੀ ਵੀ ਆਲੋਚਨਾ ਕੀਤੀ, ਜਿੱਥੇ ਵਿਕਾਸਸ਼ੀਲ ਦੇਸ਼ਾਂ ਦਾ ਸਮੂਹ ਐਤਵਾਰ ਨੂੰ ਮਿਲਿਆ ਸੀ। ਟਰੰਪ ਨੇ ਇਸ ਸਮੂਹ- ਜਿਸ ਵਿੱਚ ਬ੍ਰਾਜ਼ੀਲ ਸ਼ਾਮਲ ਹੈ, ਨੂੰ "ਅਮਰੀਕਾ ਵਿਰੋਧੀ" ਕਿਹਾ ਅਤੇ ਕਿਹਾ ਕਿ ਉਨ੍ਹਾਂ ਦੇਸ਼ਾਂ 'ਤੇ ਵਾਧੂ 10% ਟੈਰਿਫ ਲਗਾਇਆ ਜਾਵੇਗਾ।

ਇਸ ਸਭ ਤੋਂ ਬਾਅਦ ਰਾਸ਼ਟਰਪਤੀ ਲੂਲਾ ਡੀ ਸਿਲਵਾ ਨੇ ਸੋਮਵਾਰ ਨੂੰ ਟਰੰਪ ਦੀਆਂ ਸੋਸ਼ਲ ਮੀਡੀਆ ਧਮਕੀਆਂ ਦੇ ਵਿਰੁੱਧ ਜਵਾਬੀ ਕਾਰਵਾਈ ਕੀਤੀ। ਉਨ੍ਹਾਂ ਕਿਹਾ, "ਉਸਨੂੰ ਇਹ ਜਾਣਨ ਦੀ ਜ਼ਰੂਰਤ ਹੈ ਕਿ ਦੁਨੀਆਂ ਬਦਲ ਗਈ ਹੈ। ਸਾਨੂੰ ਕੋਈ ਰਾਜਾ ਨਹੀਂ ਚਾਹੀਦਾ।"