ਜੀਜਾ ਵਾਰ ਦੇ ਦੁਆਨੀ ਖੋਟੀ,
ਗਿੱਧੇ ਵਿੱਚ ਤੇਰੀ ਸਾਲੀ ਨੱਚਦੀ।
ਜੀਜਾ ਵਾਰ ਦੇ …
ਉੱਚੇ ਟਿੱਬੇ ਮੈਂ ਭਾਂਡੇ ਮਾਂਜਦੀ,
ਉੱਤੋਂ ਰੁੜ੍ਹ ਗਿਆ ਗਲਾਸ।
ਹੁਣ ਕਿਉਂ ਰੋਂਦੀ ਆਂ,
ਜੀਜਾ ਲੈ ਗਿਆ ਸਾਕ।
ਹੁਣ ਕਿਉਂ …
ਉੱਚੇ ਟਿੱਬੇ ਦੇ ਸਾਧੂ ਨ੍ਹਾਉਂਦੇ,
ਮੇਰਾ ਕਾਲਜਾ ਘਿਰਦਾ ਨੀ।
ਜੀਜਾ ਸਾਲੀ ਦੇ ਸਾਕ ਨੂੰ ਫਿਰਦਾ ਨੀ।
ਜੀਜਾ ਸਾਲੀ ਤਾਸ਼ ਖੇਡਦੇ,
ਸਾਲੀ ਗਈ ਜਿੱਤ ਵੇ,
ਜੀਜਾ ਨਹਿਲੇ ਤੇ ਦਹਿਲਾ ਸਿੱਟ ਵੇ।
ਜੀਜਾ ਨਹਿਲੇ ਤੇ …
ਝੂਟਾ-ਝੂਟਾ-ਝੂਟਾ,
ਜਿੱਥੇ ਦਿਉਰ ਪੱਬ ਧਰਦਾ,
ਉੱਥੇ ਉੱਗਦਾ ਸਰੂ ਦਾ ਬੂਟਾ।
ਬੂਟਾ ਲਾ ਨੀ ਲਿਆ,
ਫੁੱਲ ਖਿੜ ਨੀ ਗਿਆ।
ਸੋਹਣੀ ਭਾਬੋ ਮਿਲ ਗਈ,
ਦਿਉਰ ਤਿੜ ਨੀ ਗਿਆ।
ਲੰਮੀ ਲੰਮੀ ਕਿੱਕਰ ਕੁੜੀਓ,
ਵਿੱਚ ਵੱਜੇ ਕੋਈ ਨਾ।
ਜਿੱਥੇ ਸਹੁਰਾ ਸ਼ਰਾਬੀ,
ਨੂੰਹ ਦਾ ਹੱਜ ਕੋਈ ਨਾ।
ਹਰੀ ਹਰੀ ਕਣਕ ਦੁਆਬੇ ਦੀ,
ਜਿਹੜੀ ਗਿੱਧਾ ਨਾ ਪਾਊ ਰੰਨ ਬਾਬੇ ਦੀ।
ਜਿਹੜੀ ਗਿੱਧਾ ਨਾ ਪਾਊ…
ਸੁਣ ਵੇ ਮੁੰਡਿਆ ਕੈਂਠੇ ਵਾਲਿਆ,
ਖੂਹ ਟੋਭੇ ਨਾਂ ਜਾਈਏ।
ਵੇ ਖੂਹ ਟੋਭੇ ਤੇਰੀ ਹੋਵੇ ਚਰਚਾ,
ਚਰਚਾ ਨਾਂ ਕਰਵਾਈਏ।
ਵੇ ਜਿਸਦੀ ਬਾਂਹ ਫ਼ੜ੍ਹੀਏ,
ਸਿਰ ਦੇ ਨਾਲ ਨਿਭਾਈਏ।
ਵੇ ਜਿਸ ਦੀ ਬਾਂਹ ਫ਼ੜ੍ਹੀਏ...
ਇੱਕ ਕੁੜੀ ਤੂੰ ਕੁਆਰੀ,
ਦੂਜੀ ਅੱਖ ਟੂਣੇਹਾਰੀ।
ਤੀਜਾ ਲੌਂਗ ਲਿਸ਼ਕਾਰੇ ਮਾਰ ਪੱਟਦਾ,
ਨੀ ਤੂੰ ਜਿਊਣ ਜੋਗਾ ਛੱਡਿਆ ਨਾ ਪੁੱਤ ਜੱਟ ਦਾ।
ਨੀ ਤੂੰ ਜਿਊਣ ਜੋਗਾ….
ਛੋਲੇ ਛੋਲੇ ਛੋਲੇ,
ਬਾਪੂ ਨੂੰ ਭਰਮ ਪਿਆ,
ਧੀਏ ਕੌਣ ਨੀ ਚੁਬਾਰੇ ਵਿੱਚ ਬੋਲੇ।
ਕੱਲੀ ਬਾਪੂ ਮੈਂ ਹੋਵਾਂ,
ਦੂਜੀ ਗੁੂੰਜ ਚਰਖੇ ਦੀ ਬੋਲੇ।
ਜਾਨ ਬਚਾ ਮੁੰਡਿਆ,
ਹੋ ਚਰਖੇ ਦੇ ਉਹਲੇ।
ਜਾਨ ਬਚਾ …
ਹੋਰਾਂ ਦੇ ਤਾਂ ਨਾਭੀ ਪੱਗਾਂ,
ਫਿੱਕੀ ਗੁਲਾਬੀ ਤੇਰੇ।
ਵੇ ਜਾਦੂ ਕਰ ਦੂੰਗੀ,
ਮਗਰ ਫਿਰੇਂਗਾ ਮੇਰੇ।
ਜੇ ਤੂੰ ਸੁਨਿਆਰੇ ਕੋਲੋਂ ਨੱਤੀਆਂ ਕਢਾਉਣੀਆਂ,
ਸਾਨੂੰ ਵੀ ਕਢਾ ਦੇ ਗੁੱਟ ਮੁੰਡਿਆ,
ਨਹੀਂ ਤਾਂ ਜਾਣਗੇ ਮੁਲਾਹਜ਼ੇ ਟੁੱਟ ਮੁੰਡਿਆ।
ਨਹੀਂ ਤਾਂ ਜਾਣਗੇ...