ਇੱਕ ਕੁੜੀ ਤੂੰ ਕੁਆਰੀ,
ਦੂਜੀ ਅੱਖ ਟੂਣੇਹਾਰੀ,
ਤੀਜਾ ਲੌਗ ਲਿਸ਼ਕਾਰੇ ਮਾਰ ਮਾਰ ਪੱਟਦਾ,
ਨੀ ਤੂੰ ਜਿਊਣ ਜੋਗਾ ਛੱਡਿਆ ਨਾ ਪੁੱਤ ਜੱਟ ਦਾ।
ਨੀ ਤੂੰ ਜਿਊਣ ਜੋਗਾ…..
ਹੋਰਾਂ ਦੇ ਤਾਂ ਨਾਭੀ ਪੱਗਾਂ,
ਫਿੱਕੀ ਗੁਲਾਬੀ ਤੇਰੇ,
ਵੇ ਜਾਦੂ ਕਰ ਦੂੰਗੀ ਮਗਰ ਫਿਰੇਂਗਾ ਮੇਰੇ,
ਵੇ ਜਾਦੂ ਕਰ ਦੂੰਗੀ ਮਗਰ ਫਿਰੇਂਗਾ ਮੇਰੇ…
ਤੇਲੀਆਂ ਦੇ ਘਰ ਚੋਰੀ ਹੋ ਗਈ,
ਚੋਰੀ ਹੋ ਗਈ ਰੂੰ।
ਵੇ ਜਾਏ ਵੱਢੀ ਦਿਆ,
ਵਿੱਚੇ ਸੁਣੀਦਾ ਤੂੰ।
ਵੇ ਜਾਏ….
ਖਾਣ ਨਾ ਜਾਣਦੀ ਪੀਣ ਨਾ ਜਾਣਦੀ,
ਖਾਣ ਜਾਣਦੀ ਮੇਵੇ।
ਬਈ ਜੱਟੀ ਫੁੱਟਬਾਲ ਵਰਗੀ,
ਸੁੱਤੀ ਪਈ ਵੀ ਟਿਕਣ ਨਾ ਦੇਵੇ।
ਜੇ ਜੱਟੀਏ ਜੱਟ ਕੁੱਟਣਾ ਹੋਵੇ,
ਕੁੱਟੀਏ ਸੰਦੂਖਾਂ ਉਹਲੇ,
ਨੀ ਪਹਿਲਾਂ ਜੱਟ ਤੋਂ ਮੱਕੀ ਪੀਹਾਈਏ,
ਫੇਰ ਪੀਹਾਈਏ ਛੋਲੇ,
ਨੀ ਜੱਟੀਏ ਦੇ ਦਬਕਾ ਜੱਟ ਫੇਰ ਨਾ ਬਰਾਬਰ ਬੋਲੇ।
ਜੱਟੀਏ ਦੇ ……
ਗਿੱਧਾ ਪਾਇਆ, ਮੇਲ ਨਚਾਇਆ,
ਹੋਗੀ ਜਾਣ ਦੀ ਤਿਆਰੀ।
ਹਾਕਾਂ ਘਰ ਵੱਜੀਆਂ,
ਛੱਡ ਮਿੱਤਰਾ ਫੁਲਕਾਰੀ।
ਹਾਕਾਂ ਘਰ …….
ਤੀਆਂ ਦੇ ਵਿੱਚ ਨੱਚੀ ਜੱਟੀ,
ਨੱਚੀ ਲਲਕਾਰ ਕੇ,
ਚੜ੍ਹਦੀ ਜਵਾਨੀ ਨੱਚੀ ਅੱਡੀ ਮਾਰ ਕੇ।
ਚੜ੍ਹਦੀ ਜਵਾਨੀ ….
ਜੰਡੀਆਂ ਦੀ ਜੰਨ ਢੁੱਕੀ ਰਕਾਨੇ,
ਢੁੱਕੀ ਲੜ ਵਣਜਾਰੇ।
ਲੜ ਵਣਜਾਰੇ ਪਾਉਣ ਬੋਲੀਆਂ,
ਗੱਭਰੂ ਹੋ ਗਏ ਸਾਰੇ।
ਘੁੰਡ ਵਾਲੀ ਦੇ ਨੇਤਰ ਸੋਹਣੇ,
ਜਿਉਂ ਬੱਦਲਾਂ ਵਿੱਚ ਤਾਰੇ।
ਹੇਠਲੀ ਬਰੇਤੀ ਦਾ,
ਮੁੱਲ ਦੱਸ ਦੇ ਮੁਟਿਆਰੇ।
ਊਠਾਂ ਵਾਲਿਓ ਵੇ,
ਊਠ ਲੱਦੇ ਨੇ ਲਾਹੌਰ ਨੂੰ।
ਕੱਲੀ ਕੱਤਾਂ ਵੇ,
ਘਰ ਘੱਲਿਓ ਮੇਰੇ ਭੌਰ ਨੂੰ।
ਆਈਂ ਨੀ ਮੇਲਣੇ,
ਜਾਈਂ ਨੀ ਮੇਲਣੇ।
ਗਿੱਧੇ ਵਿੱਚ ਬਣ ਕੇ ਪਰਾਹੁਣੀ,
ਛਾਈਂ ਨੀ ਮੇਲਣੇ।
ਗਿੱਧੇ ਵਿੱਚ ਬਣ ਕੇ ...
ਨਿੱਕੀ ਹੁੰਦੀ ਮੈਂ ਰਹਿੰਦੀ ਨਾਨਕੇ,
ਖਾਂਦੀ ਦੁੱਧ ਮਲਾਈਆਂ।
ਤੁਰਦੀ ਦਾ ਲੱਕ ਝੂਟੇ ਖਾਂਦਾ,
ਪੈਰੀਂ ਝਾਂਜਰਾਂ ਪਾਈਆਂ।
ਗਿੱਧੇ ਵਿਚ ਨੱਚਦੀ ਦਾ,
ਦੇਵੇ ਰੂਪ ਦੁਹਾਈਆਂ।
ਗਿੱਧੇ ਵਿਚ….
ਜੀਜਾ ਵਾਰ ਦੇ ਦੁਆਨੀ ਖੋਟੀ,
ਗਿੱਧੇ ਵਿੱਚ ਤੇਰੀ ਸਾਲੀ ਨੱਚਦੀ,
ਜੀਜਾ ਵਾਰ ……