ਮਾਰਕ ਕਾਰਨੀ ਕੈਨੇਡਾ ਦੀਆਂ ਚੋਣਾਂ ਦਾ ਅੱਜ ਕਰਨਗੇ ਐਲਾਨ, ਨੇਪੀਅਨ ਰਾਈਡਿੰਗ ਤੋਂ ਚੋਣ ਲੜਨ ਦਾ ਫੈਸਲਾ
ਕੈਨੇਡਾ ਦੇ ਨਵੇਂ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅੱਜ 22 ਮਾਰਚ 2025 ਨੂੰ ਗਵਰਨਰ ਜਨਰਲ ਮੈਰੀ ਸਾਈਮਨ ਨੂੰ ਸੰਸਦ ਭੰਗ ਕਰਨ ਦੀ ਅਪੀਲ ਕਰਨ ਦੀ ਤਿਆਰੀ ਵਿੱਚ ਹਨ, ਜਿਸ ਨਾਲ ਦੇਸ਼ ਵਿੱਚ 28 ਅਪ੍ਰੈਲ 2025 ਨੂੰ ਆਮ ਚੋਣਾਂ ਦਾ ਰਾਹ ਖੁੱਲ੍ਹ ਸਕਦਾ ਹੈ। ਇਸ ਦੇ ਨਾਲ ਹੀ ਉਹ ਓਟਵਾ ਦੀ ਨੇਪੀਅਨ ਰਾਈਡਿੰਗ ਤੋਂ ਲਿਬਰਲ ਪਾਰਟੀ ਦੇ ਉਮੀਦਵਾਰ ਵਜੋਂ ਚੋਣ ਮੈਦਾਨ ਵਿੱਚ ਉਤਰਨਗੇ। ਲਿਬਰਲ ਪਾਰਟੀ ਨੇ ਸ਼ਨੀਵਾਰ ਰਾਤ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ ’ਤੇ ਇਹ ਐਲਾਨ ਕੀਤਾ, “ਓਟਵਾ ਉਹ ਥਾਂ ਹੈ ਜਿੱਥੇ ਮਾਰਕ ਕਾਰਨੀ ਨੇ ਆਪਣਾ ਪਰਿਵਾਰ ਪਾਲਿਆ, ਜਨਤਕ ਸੇਵਾ ਲਈ ਸਮਰਪਣ ਕੀਤਾ ਅਤੇ ਆਪਣੇ ਭਾਈਚਾਰੇ ਨੂੰ ਹਮੇਸ਼ਾ ਸਾਥ ਦਿੱਤਾ।”
ਮਾਰਕ ਕਾਰਨੀ, ਜਿਨ੍ਹਾਂ ਨੂੰ 14 ਮਾਰਚ ਨੂੰ ਕੈਨੇਡਾ ਦੇ 24ਵੇਂ ਪ੍ਰਧਾਨ ਮੰਤਰੀ ਵਜੋਂ ਸਹੁੰ ਚੁੱਕੀ ਸੀ, ਪਹਿਲੀ ਵਾਰ ਸੰਸਦ ਵਿੱਚ ਸੀਟ ਹਾਸਲ ਕਰਨ ਲਈ ਚੋਣ ਲੜ ਰਹੇ ਹਨ। ਉਨ੍ਹਾਂ ਨੇ ਕਿਹਾ ਹੈ ਕਿ ਸੰਕਟ ਦੇ ਇਸ ਸਮੇਂ ਵਿੱਚ ਸਰਕਾਰ ਨੂੰ ਮਜ਼ਬੂਤ ਅਤੇ ਸਪੱਸ਼ਟ ਜਨਾਦੇਸ਼ ਦੀ ਲੋੜ ਹੈ। ਸੰਭਾਵਿਤ ਚੋਣ ਮੁਹਿੰਮ 37 ਦਿਨਾਂ ਦੀ ਹੋਵੇਗੀ, ਜੋ ਕਿ ਕੈਨੇਡੀਅਨ ਚੋਣਾਂ ਦੇ ਇਤਿਹਾਸ ਅਨੁਸਾਰ ਸਭ ਤੋਂ ਘੱਟ ਮਿਆਦ ਹੈ। ਇਸ ਦੌਰਾਨ, ਹਾਊਸ ਆਫ ਕਾਮਨਜ਼ ਦੀਆਂ 343 ਸੀਟਾਂ ਲਈ ਵੋਟਿੰਗ ਹੋਵੇਗੀ, ਅਤੇ ਜਿਹੜੀ ਪਾਰਟੀ ਬਹੁਮਤ ਜਾਂ ਸਮਰਥਨ ਨਾਲ ਸਰਕਾਰ ਬਣਾਏਗੀ, ਉਸ ਦਾ ਨੇਤਾ ਅਗਲਾ ਪ੍ਰਧਾਨ ਮੰਤਰੀ ਬਣੇਗਾ।
ਚੋਣ ਦਾ ਪਿਛੋਕੜ ਅਤੇ ਟਰੰਪ ਦਾ ਪ੍ਰਭਾਵ
ਮਾਰਕ ਕਾਰਨੀ ਨੇ ਜਸਟਿਨ ਟਰੂਡੋ ਦੀ ਥਾਂ ਲਈ, ਜਿਨ੍ਹਾਂ ਨੇ ਜਨਵਰੀ 2025 ਵਿੱਚ ਅਸਤੀਫਾ ਦਿੱਤਾ ਸੀ। ਟਰੂਡੋ 9 ਮਾਰਚ ਤੱਕ ਸੱਤਾ ਵਿੱਚ ਰਹੇ, ਜਦੋਂ ਤੱਕ ਲਿਬਰਲ ਪਾਰਟੀ ਨੇ ਲੀਡਰਸ਼ਿਪ ਮੁਕਾਬਲੇ ਤੋਂ ਬਾਅਦ ਕਾਰਨੀ ਨੂੰ ਚੁਣਿਆ। ਇਸ ਤੋਂ ਪਹਿਲਾਂ ਲਿਬਰਲ ਪਾਰਟੀ ਇਸ ਸਾਲ ਚੋਣਾਂ ਵਿੱਚ ਹਾਰ ਦੀ ਕਗਾਰ ’ਤੇ ਸੀ, ਪਰ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਵਪਾਰਕ ਜੰਗ ਦੇ ਐਲਾਨ ਨੇ ਮਾਹੌਲ ਬਦਲ ਦਿੱਤਾ। ਟਰੰਪ ਨੇ ਕੈਨੇਡਾ ਦੇ ਸਟੀਲ ਅਤੇ ਅਲਮੀਨੀਅਮ ’ਤੇ 25% ਟੈਰਿਫ ਲਗਾਏ ਅਤੇ 2 ਅਪ੍ਰੈਲ ਤੋਂ ਸਾਰੇ ਕੈਨੇਡੀਅਨ ਉਤਪਾਦਾਂ ’ਤੇ ਵਿਆਪਕ ਟੈਰਿਫ ਦੀ ਧਮਕੀ ਦਿੱਤੀ। ਉਨ੍ਹਾਂ ਨੇ ਕੈਨੇਡਾ ਨੂੰ ਅਮਰੀਕਾ ਦਾ 51ਵਾਂ ਸੂਬਾ ਬਣਾਉਣ ਦੀ ਗੱਲ ਵੀ ਕਹੀ, ਜਿਸ ਨਾਲ ਕੈਨੇਡੀਅਨਾਂ ਵਿੱਚ ਰਾਸ਼ਟਰਵਾਦ ਦੀ ਲਹਿਰ ਉੱਠੀ ਅਤੇ ਲਿਬਰਲ ਪਾਰਟੀ ਦੀਆਂ ਸੰਭਾਵਨਾਵਾਂ ਮਜ਼ਬੂਤ ਹੋਈਆਂ।
ਕੰਜ਼ਰਵੇਟਿਵ ਪਾਰਟੀ ਦੇ ਨੇਤਾ ਪਿਅਰੇ ਪੋਇਲੀਵਰੇ, ਜੋ ਕਾਰਲਟਨ ਰਾਈਡਿੰਗ ਤੋਂ ਅੱਠਵੀਂ ਵਾਰ ਸੰਸਦ ਮੈਂਬਰ ਬਣਨ ਲਈ ਤਿਆਰ ਹਨ, ਕਾਰਨੀ ਦੇ ਮੁੱਖ ਚੁਣੌਤੀਕਰਤਾ ਹਨ। ਟਰੰਪ ਦੇ ਬਿਆਨਾਂ ਤੋਂ ਪਹਿਲਾਂ ਕੰਜ਼ਰਵੇਟਿਵ ਵੱਡੀ ਜਿੱਤ ਵੱਲ ਸਨ, ਪਰ ਹੁਣ ਚੋਣ ਦਾ ਮੁੱਦਾ ਟਰੰਪ ਨਾਲ ਨਜਿੱਠਣ ਦੀ ਸਮਰੱਥਾ ’ਤੇ ਕੇਂਦਰਿਤ ਹੋ ਗਿਆ ਹੈ।
ਨੇਪੀਅਨ ਰਾਈਡਿੰਗ ਦਾ ਵਿਵਾਦ
ਨੇਪੀਅਨ ਰਾਈਡਿੰਗ 2015 ਤੋਂ ਲਿਬਰਲ ਸੰਸਦ ਮੈਂਬਰ ਚੰਦਰ ਆਰੀਆ ਦੇ ਕਬਜ਼ੇ ਵਿੱਚ ਸੀ। ਪਰ ਲਿਬਰਲ ਪਾਰਟੀ ਦੀ ਗਰੀਨ ਲਾਈਟ ਕਮੇਟੀ ਨੇ ਪਿਛਲੇ ਹਫਤੇ “ਨਵੀਂ ਜਾਣਕਾਰੀ” ਦੇ ਅਧਾਰ ’ਤੇ ਆਰੀਆ ਦੀ ਨਾਮਜ਼ਦਗੀ ਰੱਦ ਕਰ ਦਿੱਤੀ। ਆਰੀਆ ਨੇ ਲੀਡਰਸ਼ਿਪ ਮੁਕਾਬਲੇ ਵਿੱਚ ਕਾਰਨੀ ਦਾ ਵਿਰੋਧ ਕੀਤਾ ਸੀ ਅਤੇ ਫਰੈਂਚ ਭਾਸ਼ਾ ਦੀ ਮਹੱਤਤਾ ਨੂੰ ਘੱਟ ਕਰਾਰ ਦਿੱਤਾ ਸੀ। ਇਸ ਨਾਲ ਨੇਪੀਅਨ ਸੀਟ ਕਾਰਨੀ ਲਈ ਖਾਲੀ ਹੋਈ।
ਕਾਰਨੀ ਦਾ ਤਜ਼ਰਬਾ ਅਤੇ ਰਣਨੀਤੀ
60 ਸਾਲਾ ਮਾਰਕ ਕਾਰਨੀ 2008 ਦੇ ਵਿੱਤੀ ਸੰਕਟ ਦੌਰਾਨ ਬੈਂਕ ਆਫ ਕੈਨੇਡਾ ਦੇ ਗਵਰਨਰ ਰਹੇ ਅਤੇ 2013 ਵਿੱਚ ਬੈਂਕ ਆਫ ਇੰਗਲੈਂਡ ਦੇ ਪਹਿਲੇ ਗੈਰ-ਨਾਗਰਿਕ ਮੁਖੀ ਬਣੇ, ਜਿੱਥੇ ਉਨ੍ਹਾਂ ਨੇ ਬ੍ਰੈਕਸਿਟ ਦੇ ਅਸਰ ਨੂੰ ਸੰਭਾਲਿਆ। ਉਨ੍ਹਾਂ ਦਾ ਅੰਤਰਰਾਸ਼ਟਰੀ ਤਜ਼ਰਬਾ ਹੁਣ ਕੈਨੇਡਾ ਦੀ ਟਰੰਪ ਨਾਲ ਸੰਭਾਵੀ ਟੱਕਰ ਵਿੱਚ ਅਹਿਮ ਮੰਨਿਆ ਜਾ ਰਿਹਾ ਹੈ।
ਕਾਰਨੀ ਐਤਵਾਰ ਨੂੰ ਗਵਰਨਰ ਜਨਰਲ ਮੈਰੀ ਸਾਈਮਨ ਨੂੰ ਸੰਸਦ ਭੰਗ ਕਰਨ ਲਈ ਕਹਿਣਗੇ, ਜਿਸ ਨਾਲ ਚੋਣ ਮੁਹਿੰਮ ਸ਼ੁਰੂ ਹੋ ਜਾਵੇਗੀ। ਇਸ ਦੇ ਨਾਲ ਹੀ, ਉਨ੍ਹਾਂ ਨੇ ਮਸ਼ਹੂਰ ਕਾਮੇਡੀਅਨ ਮਾਈਕ ਮਾਇਰਸ ਨਾਲ ਇੱਕ ਵੀਡੀਓ ਵੀ ਜਾਰੀ ਕੀਤਾ ਹੈ, ਜੋ ਚੋਣ ਪ੍ਰਚਾਰ ਦਾ ਹਿੱਸਾ ਮੰਨਿਆ ਜਾ ਰਿਹਾ ਹੈ।
ਚੋਣ ਦੀ ਤਾਰੀਖ ਅਤੇ ਪ੍ਰਕਿਰਿਆ
ਸੀਟੀਵੀ ਨਿਊਜ਼ ਅਤੇ ਸੀਬੀਸੀ ਮੁਤਾਬਕ, 28 ਅਪ੍ਰੈਲ ਨੂੰ ਵੋਟਿੰਗ ਹੋ ਸਕਦੀ ਹੈ, ਅਤੇ ਅਗਾਊਂ ਵੋਟਿੰਗ ਈਸਟਰ ਵੀਕੈਂਡ ’ਤੇ ਹੋਵੇਗੀ। ਸੰਸਦ ਦੋ ਮਹੀਨਿਆਂ ਤੋਂ ਮੁਲਤਵੀ ਸੀ ਅਤੇ ਸੋਮਵਾਰ (23 ਮਾਰਚ) ਨੂੰ ਵਾਪਸ ਬੈਠਣ ਵਾਲੀ ਸੀ, ਪਰ ਕਾਰਨੀ ਦੀ ਸੰਸਦ ਭੰਗ ਕਰਨ ਦੀ ਅਪੀਲ ਨਾਲ ਪ੍ਰਧਾਨ ਮੰਤਰੀ ਵਿਸ਼ਵਾਸ ਮਤੇ ਤੋਂ ਵੀ ਬਚ ਜਾਣਗੇ।
