ਤਰ ਵੇ ਤਰ ਵੇ ਤਰ ਵੇ,
ਮੇਰਾ ਮਾਝੇ ਸਾਕ ਨਾ ਕਰ ਵੇ।
ਮਾਝੇ ਦੇ ਜੱਟ ਬੁਰੇ ਸੁਣੀਦੇ,
ਊਠਾਂ ਨੂੰ ਪਾਉਂਦੇ ਖਲ਼ ਵੇ।
ਖਲ਼ ਤਾਂ ਮੈਥੋਂ ਕੁੱਟੀ ਨਾ ਜਾਵੇ,
ਗੁੱਤੋਂ ਲੈਂਦੇ ਫੜ੍ਹ ਵੇ।
ਮੇਰਾ ਉੱਡੇ ਡੋਰੀਆ,
ਮਹਿਲਾਂ ਵਾਲੇ ਘਰ ਵੇ।
ਮੇਰਾ ਉੱਡੇ ਡੋਰੀਆ…
ਆ ਵਣਜਾਰਿਆ ਬਹਿ ਵਣਜਾਰਿਆ,
ਕਿੱਥੇ ਨੇ ਤੇਰੇ ਘਰ ਵੇ,
ਭੀੜੀ ਵੰਗ ਬਚਾ ਕੇ ਚਾੜ੍ਹੀਂ,
ਮੈਂ ਜਾਊਂਗੀ ਮਰ ਵੇ।
ਮੇਰਾ ਉੱਡੇ ਡੋਰੀਆ,
ਮਹਿਲਾਂ ਵਾਲੇ ਘਰ ਵੇ।
ਮੇਰਾ ਉੱਡੇ ਡੋਰੀਆ...
ਅੱਡੀ ਤਾਂ ਮੇਰੀ ਕੌਲ ਕੱਚ ਦੀ,
ਗੂਠੇ ਤੇ ਸਿਰਨਾਮਾ।
ਬਈ ਲਿਖ ਲਿਖ ਚਿੱਠੀਆਂ ਡਾਕੀ ਪਾਵਾਂ,
ਧੁਰ ਦੇ ਪਤੇ ਮੰਗਾਵਾਂ।
ਮੁੰਡਿਆ ਨਾਂ ਦੱਸ ਜਾ,
ਜੋੜ ਬੋਲੀਆਂ ਪਾਵਾਂ।
ਮੁੰਡਿਆ ਨਾਂ….
ਅੱਡੀ ਤਾਂ ਮੇਰੀ ਕੌਲ ਕੱਚ ਦੀ,
ਗੂਠੇ ਤੇ ਸਿਰਨਾਮਾ,
ਬਈ ਲਿਖ-ਲਿਖ ਚਿੱਠੀਆਂ ਡਾਕ 'ਚ ਪਾਵਾਂ,
ਧੁਰ ਦੇ ਪਤੇ ਮੰਗਾਵਾਂ।
ਮੁੰਡਿਆ ਨਾਂ ਦੱਸ ਜਾ,
ਜੋੜ ਬੋਲੀਆਂ ਪਾਵਾਂ।
ਮੁੰਡਿਆ ਨਾਂ ਦੱਸ ਜਾ....
ਨਹਾ ਧੋ ਕੇ ਮੁੰਡਾ ਖੁੰਢਾਂ ਉੱਤੇ ਬਹਿੰਦਾ,
ਅੱਡੀਆਂ ਦੀ ਮੈਲ ਨਾ ਲਾਹੁੰਦਾ ਨੀ।
ਮੁੰਡਾ ਰੰਨਾਂ ਪਸੰਦ ਨਾ ਲਿਆਉਂਦਾ ਨੀ...
ਰੰਗ ਸੱਪਾਂ ਦੇ ਕਾਲੇ,
ਸੱਪ ਕੀਲ ਕੇ ਪਟਾਰੀ ਵਿੱਚ ਬੰਦ ਹੋ ਗਿਆ,
ਮੁੰਡਾ ਗੋਰਾ ਰੰਗ ਦੇਖ ਕੇ ਮਲੰਗ ਹੋ ਗਿਆ।
ਕੱਦ ਸਰੂ ਦੇ ਬੂਟੇ ਵਰਗਾ,
ਤੁਰਦਾ ਨੀਵੀਂ ਪਾਕੇ,
ਨੀ ਮੋੜਿਆ ਨਹੀਂਓ ਮੁੜਦਾ,
ਵੇਖ ਲਿਆ ਸਮਝਾਕੇ।
ਸਈਓ ਨੀ ਮੈਨੂੰ ਰੱਖਣਾ ਪਿਆ,
ਮੁੰਡਾ ਹਿੱਕ ਦਾ ਤਬੀਤ ਬਣਾਕੇ।
ਸਈਓ ਨੀ ਮੈਨੂੰ…..
ਉੱਚੇ ਟਿੱਬੇ ਮੈਂ ਤਾਣਾ ਤਣਦੀ,
ਤਣਦੀ ਰੀਝਾਂ ਲਾਕੇ।
ਮਿਲ ਜਾ ਹਾਣ ਦਿਆ,
ਤੂੰ ਸਹੁਰੇ ਘਰ ਆਕੇ।
ਮਿਲ ਜਾ ਹਾਣ ਦਿਆ…
ਮਾਂ ਮੇਰੀ ਨੇ ਬੋਹੀਆ ਭੇਜਿਆ,
ਵਿੱਚ ਭੇਜੀ ਕਸਤੂਰੀ।
ਘਟਗੀ ਤਿੰਨ ਰੱਤੀਆਂ,
ਕਦੋਂ ਕਰੇਂਗਾ ਪੂਰੀ।
ਬਾਰੀ ਬਰਸੀ ਖੱਟਣ ਗਈ ਸੀ,
ਖੱਟ ਕੇ ਲਿਆਂਦਾ ਫੀਤਾ।
ਮਾਮਾ ਨਿੱਕਾ ਜਿਹਾ,
ਮਾਮੀ ਨੇ ਖਿੱਚ ਕੇ ਬਰਾਬਰ ਕੀਤਾ।
ਮਾਮਾ ਨਿੱਕਾ ਜਿਹਾ...
ਸੱਪ ਤਾਂ ਮੇਰੇ ਕਾਹਤੋਂ ਲੜਜੇ,
ਮੈਂ ਮਾਪਿਆਂ ਨੂੰ ਪਿਆਰੀ।
ਮਾਂ ਤਾਂ ਮੇਰੀ ਦਾਜ ਜੋੜਦੀ,
ਸਣੇ ਬਾਗ ਫੁਲਕਾਰੀ।
ਹਟ ਕੇ ਬਹਿ ਮਿੱਤਰਾ,
ਸਭ ਨੂੰ ਜਵਾਨੀ ਪਿਆਰੀ।
ਮਾਏ ਤੂੰ ਮੇਰਾ ਦੇ ਮੁਕਲਾਵਾ,
ਵਾਰ ਵਾਰ ਸਮਝਾਵਾਂ।
ਚੁੱਲ੍ਹੇ ਚੌਂਤਰੇ ਸਾਰੇ ਢਹਿ ਗਏ,
ਸੁੰਨੀਆਂ ਪਈਆਂ ਸਬ੍ਹਾਤਾਂ।
ਹਾਏ ਮੇਰੇ ਯਾਰ ਦੀਆਂ,
ਕੌਣ ਕਟਾਊ ਰਾਤਾਂ।