ਪੀਆਈਏ 56,000 ਪਾਕਿਸਤਾਨੀ ਸ਼ਰਧਾਲੂਆਂ ਨੂੰ ਹੱਜ ਦੀ ਯਾਤਰਾ ਲਈ ਸਾਊਦੀ ਅਰਬ ਲਿਜਾਏਗਾ

ਦੇਸ਼ ਦੇ ਇੰਟਰਨੈਸ਼ਨਲ ਏਅਰਲਾਈਨ ਕੈਰੀਅਰ(PIA) ਨੇ ਆਪਣੀਆਂ 2025 ਦੀਆਂ ਉਡਾਣਾਂ ਦਾ ਸ਼ਡਿਊਲ ਜਾਰੀ ਕੀਤਾ ਹੈ ਜਿਸ ਅਨੁਸਾਰ  29 ਅਪ੍ਰੈਲ ਤੋਂ 1 ਜੂਨ ਤੱਕ ਹੱਜ ਲਈ ਉਡਾਣਾਂ ਸ਼ੁਰੂ ਹੋਣਗੀਆਂ।  ਇਸ ਯਾਤਰਾ ਦੌਰਾਨ, ਏਅਰਲਾਈਨ ਦੀਆਂ 280 ਤੋਂ ਵੱਧ ਉਡਾਣਾਂ ਚੱਲਣਗੀਆਂ।

ਦਿ ਐਕਸਪ੍ਰੈਸ ਟ੍ਰਿਬਿਊਨ ਦੇ ਅਨੁਸਾਰ, ਇਸਲਾਮਾਬਾਦ ਦੀ ਹੱਜ ਸਕੀਮ ਤਹਿਤ ਲਗਭਗ 20,000 ਸ਼ਰਧਾਲੂ ਯਾਤਰਾ ਕਰਨਗੇ ਅਤੇ 36,000 ਸ਼ਰਧਾਲੂ ਸਰਕਾਰ ਦੇ ਨਿੱਜੀ ਪ੍ਰਬੰਧਾਂ ਰਾਹੀਂ ਅੱਗੇ ਵਧਣਗੇ। ਸ਼ਰਧਾਲੂਆਂ ਨੂੰ ਲਿਜਾਣ ਲਈ ਪੀਆਈਏ, ਬੋਇੰਗ 777 ਅਤੇ ਏਅਰਬੱਸ ਏ320 ਜਹਾਜ਼ਾਂ ਦੀ ਵਰਤੋਂ ਕਰੇਗੀ। ਫਿਰ 12 ਜੂਨ ਤੋਂ ਸ਼ਰਧਾਲੂਆਂ ਨੂੰ ਪਾਕਿਸਤਾਨ ਵਾਪਸ ਲਿਆਉਣ ਲਈ ਹੱਜ ਤੋਂ ਵਾਪਸ  ਉਡਾਣਾਂ ਦਾ ਸੰਚਾਲਨ ਸ਼ੁਰੂ ਹੋਵੇਗਾ ਜੋਕਿ 10 ਜੁਲਾਈ ਤੱਕ ਜਾਰੀ ਰਹੇਗਾ।

ਦੀ ਨੇਸ਼ਨ ਦੇ ਅਨੁਸਾਰ, ਸਰਕਾਰੀ ਅਧਿਕਾਰੀਆਂ ਨੇ ਕਿਹਾ ਕਿ ਸਾਰੇ ਸ਼ਰਧਾਲੂਆਂ ਲਈ ਸੁਰੱਖਿਅਤ ਅਤੇ ਸਮੇਂ ਸਿਰ ਵਾਪਸੀ ਦੀ ਸਹੂਲਤ ਲਈ ਇੱਕ ਵਿਆਪਕ ਯੋਜਨਾ ਤਿਆਰ ਕੀਤੀ ਗਈ ਹੈ, ਜਿਸ ਵਿੱਚ ਸ਼ਰਧਾਲੂਆਂ ਲਈ ਸਹੂਲਤਾਂ ਨੂੰ ਯਕੀਨੀ ਬਣਾਉਣ ਅਤੇ ਯਾਤਰਾ ਸਮੇਂ ਰੁਕਾਵਟਾਂ ਤੋਂ ਬਚਣ ਲਈ ਵਿਸ਼ੇਸ਼ ਉਪਾਅ ਕੀਤੇ ਗਏ ਹਨ।

ਪੀਆਈਏ ਵਿੱਚ ਵੱਡੇ ਪੱਧਰ 'ਤੇ ਸੁਧਾਰ ਕੀਤੇ ਜਾ ਰਹੇ ਹਨ ਕਿਉਂਕਿ ਰਾਸ਼ਟਰੀ ਏਅਰਲਾਈਨ ਦਾ ਨਿੱਜੀਕਰਨ ਹੋਣ ਜਾ ਰਿਹਾ ਹੈ, ਜਿਸ ਵਿੱਚ ਸਰਕਾਰ ਲੰਬੇ ਸਮੇਂ ਤੋਂ ਚੱਲ ਰਹੇ ਮੁੱਦਿਆਂ ਨੂੰ ਹੱਲ ਕਰਨ ਅਤੇ ਆਪਣੀ ਵਿੱਤੀ ਸਥਿਤੀ ਅਤੇ ਸੰਚਾਲਨ ਨੂੰ ਬਿਹਤਰ ਬਣਾਉਣ ਲਈ ਰਣਨੀਤਕ ਭਾਈਵਾਲਾਂ ਨੂੰ ਆਕਰਸ਼ਿਤ ਕਰਨ 'ਤੇ ਧਿਆਨ ਕੇਂਦਰਿਤ ਕਰ ਰਹੀ ਹੈ।

ਪੀਆਈਏ ਕਦੇ ਏਸ਼ੀਆ ਵਿੱਚ ਸਭ ਤੋਂ ਵੱਡੀਆਂ ਏਅਰਲਾਈਨਾਂ ਵਿੱਚੋਂ ਇੱਕ ਵਜੋਂ ਜਾਣਿਆ ਜਾਂਦਾ ਸੀ ਪਰੰਤੂ ਇਸਦੇ ਮਾੜੇ ਪ੍ਰਬੰਧਨ, ਜ਼ਿਆਦਾ ਸਟਾਫ, ਸੁਰੱਖਿਆ ਮੁੱਦਿਆਂ, ਸਰਕਾਰੀ ਅਤੇ ਨਿੱਜੀ ਭ੍ਰਿਸ਼ਟਾਚਾਰ ਅਤੇ ਭਾਰੀ ਕਰਜ਼ੇ ਕਾਰਨ ਇਹ ਵਿੱਤੀ ਬੋਝ ਬਣ ਗਿਆ ਹੈ। ਏਅਰਲਾਈਨ ਵਿੱਚ ਇੱਕ ਵੱਡੇ ਪੱਧਰ 'ਤੇ ਕਾਫੀ ਸੁਧਾਰ ਕੀਤੇ ਗਏ ਹਨ ਜਿਸਦੇ ਨਤੀਜੇ ਵਜੋਂ ਇਸਦਾ ਨਿੱਜੀਕਰਨ ਕਰਨ ਲਈ ਪੀਆਈਏ ਦਾ ਪੂਰੀ ਤਰ੍ਹਾਂ ਪੁਨਰਗਠਨ ਕੀਤਾ ਗਿਆ ਹੈ।