ਪਾਵੇ ਪਾਵੇ ਪਾਵੇ,
ਨੀ ਤੂੰ ਹੀ ਸਾਨੂੰ ਸੋਹਣੀ ਲੱਗਦੀ,
ਹੋਰ ਮੇਚ ਨਾ ਆਵੇ।
ਮੈਂ ਜਨਮ ਜਨਮ ਵਿੱਚ ਪਾਵਾਂ ਤੈਨੂੰ,
ਨੀ ਜੇਕਰ ਮਾਲਕ ਚਾਹਵੇ,
ਆਜਾ ਨੀ ਵਟਾ ਲੈ ਦਿਲ ਨੂੰ,
ਬਹਿ ਪਿੱਪਲਾਂ ਦੀ ਛਾਵੇਂ।
ਆਜਾ ਨੀ ਵਟਾ ਲੈ ਦਿਲ ਨੂੰ...
ਚੱਕ ਲਿਆ ਟੋਕਰਾ ਚਲ ਪਈ ਖੇਤ ਨੂੰ,
ਮੈਂ ਵੀ ਮਗਰੇ ਆਇਆ।
ਵੱਟਾਂ ਡੋਲੇ ਸਾਰੇ ਫਿਰ ਗਿਆ,
ਤੇਰਾ ਮਨ੍ਹਾਂ ਨਾ ਥਿਆਇਆ।
ਪਾਣੀ ਪਿਆ ਪਤਲੋ,
ਮਰ ਗਿਆ ਯਾਰ ਤਿਹਾਇਆ।
ਕੱਢਣ ਨਾ ਜਾਣਦੀ ਕੱਤਣ ਨਾ ਜਾਣਦੀ,
ਜਾਣਦੀ ਨਾ ਕੱਪੜੇ ਸੀਣਾ,
ਨੀ ਕੱਚੀਏ ਕੁਆਰ ਗੰਢਲੇ,
ਪਾਣੀ ਤੇਰਿਆਂ ਹੱਥਾਂ ਦਾ ਪੀਣਾ।
ਉੱਚੀ ਉੱਚੀ ਖੂਹੀ ਤੇ ਮੈਂ ਪਾਣੀ ਭਰਦੀ ਆਂ,
ਗਾਗਰ ਭਰਦੀ ਆਂ, ਬਾਲਟੀ ਭਰਦੀ ਆਂ।
ਵੱਡਿਆਂ ਘਰਾਂ ਦੀ ਮੈਂ ਧੀ ਹਾਣੀਆਂ,
ਪਾਣੀ ਗੋਰਿਆਂ ਹੱਥਾਂ ਦਾ ਪੀ ਹਾਣੀਆਂ।
ਪਾਣੀ ਗੋਰਿਆਂ…
ਭੇਤੀ ਚੋਰ ਦੁਪਹਿਰੇ ਲੁੱਟਦੇ,
ਪਾੜ ਲਾਉਣ ਪਿਛਵਾੜੇ।
ਗਹਿਣੇ ਗੱਟੇ ਕਦੇ ਨਾ ਲੁੱਟਦੇ,
ਲਾਹੁੰਦੇ ਕੰਨਾਂ ਦੇ ਵਾਲੇ।
ਬਿਨ ਮੁਕਲਾਈਆਂ ਦੇ,
ਪਲੰਘ ਘੁੰਗਰੂਆਂ ਵਾਲੇ।
ਪੱਚੀਆਂ ਪਿੰਡਾਂ ਦਾ ਮੇਰਾ ਢੋਲ ਪਟਵਾਰੀ,
ਨਿੱਤ ਆਉਣਾ ਜਾਣਾ ਉਹਦਾ ਕੰਮ ਸਰਕਾਰੀ,
ਮੇਰਾ ਤਾਂ ਮੰਦੜਾ ਹਾਲ ਮਾਏਂ ਮੇਰੀਏ,
ਦੱਸ ਕੀਹਦਾ ਕੱਢਾਂ ਰੁਮਾਲ ਮਾਏਂ ਮੇਰੀਏ…
ਬਾਰੀ ਬਰਸੀ ਖੱਟਣ ਗਿਆ ਸੀ ਹੋ ਬਾਰੀ ਬਰਸੀ….
ਬਾਰੀ ਬਰਸੀ ਖੱਟਣ ਗਿਆ ਸੀ ਖੱਟ ਕੇ ਲਿਆਂਦਾ ਪਤਾਸਾ…
ਚੁੰਨੀ ਨਾਲ ਸਿਰ ਢਕਦੀ,ਨੰਗਾਂ ਰੱਖਦੀ ਕਲਿੱਪ ਵਾਲਾ ਪਾਸਾ..
ਚੁੰਨੀ ਨਾਲ ਸਿਰ ਢਕਦੀ,ਨੰਗਾਂ ਰੱਖਦੀ ਕਲਿੱਪ ਵਾਲਾ ਪਾਸਾ..
ਸਹੁਰੇ ਸਹੁਰੇ ਨਾ ਕਰਿਆ ਕਰ ਨੀ,
ਵੇਖ ਸਹੁਰੇ ਘਰ ਜਾ ਕੇ।
ਪਹਿਲਾਂ ਦਿੰਦੇ ਖੰਡ ਦੀਆਂ ਚਾਹਾਂ,
ਫੇਰ ਦਿੰਦੇ ਗੁੜ ਪਾ ਕੇ।
ਨੀ ਰੰਗ ਬਦਲ ਗਿਆ,
ਦੋ ਦਿਨ ਸਹੁਰੇ ਜਾ ਕੇ।
ਨੀ ਰੰਗ ਬਦਲ ਗਿਆ...
ਦਿਨ ਨਾ ਵੇਖਦਾ ਰਾਤ ਨਾ ਵੇਖਦਾ,
ਆ ਖੜਕਾਉਂਦਾ ਕੁੰਡਾ,
ਹਾੜਾ ਨੀ ਮੇਰਾ ਦਿਲ ਮੰਗਦਾ,
ਟੁੱਟ ਪੈਣਾ ਲੰਬੜਾਂ ਦਾ ਮੁੰਡਾ।
ਟੁੱਟੀ ਮੰਜੀ ਜੇਠ ਦੇ,
ਪਹਿਲਾ ਹੀ ਪੈਰ ਧਰਿਆ,
ਨੀ ਮਾਂ ਮੇਰੇ ਏਥੇ,
ਏਥੇ ਹੀ ਨੂੰਹਾਂ ਲੜਿਆ,
ਨੀ ਮਾਂ ਮੇਰੇ ……
ਤੇਰਾ ਮਾਰਾ ਮੈਂ ਖੜ੍ਹਿਆ ਮੋੜ ਤੇ,
ਲੱਤ ਸਾਇਕਲ ਤੋਂ ਲਾਹ ਕੇ।
ਨੀ ਪਾਸਾ ਮਾਰ ਕੇ ਲੰਘਦੀ ਕੋਲ ਦੀ,
ਝਾਂਜਰ ਨੂੰ ਛਣਕਾ ਕੇ।
ਨੀ ਮਨ ਪਰਦੇਸੀ ਦਾ,
ਲੈ ਗਈ ਅੱਖਾਂ ਵਿਚ ਪਾ ਕੇ।
ਉੱਚੇ ਟਿੱਬੇ ਮੈਂ ਤਾਣਾ ਤਣਦੀ,
ਉੱਤੋਂ ਦੀ ਲੰਘ ਗਈ ਵੱਛੀ,
ਨੀ ਨਣਦੇ ਮੋਰਨੀਏ ਘਰ ਜਾਕੇ ਨਾ ਦੱਸੀ।
ਨੀ ਨਣਦੇ….