ਵਿਹਲੀਆਂ ਗੱਲਾਂ ਛੱਡੋ, ਹਿੰਮਤ ਕਰੋ । ਕੰਮ ਫਤਹ ਹੀ ਫਤਹ ਜੇ । ‘ਬੱਧਾ ਲੱਕ ਮਰੋੜਿਆ ਮੁੰਨਾਂ ਕੋਹ ਲਾਹੌਰ' ਵਾਲੀ ਅਖਾਣ ਸਿਆਣਿਆਂ ਐਵੇਂ ਨਹੀਂ ਕਹੀ।
ਭਾਗ ਸੁਲਖਾ- ਇਹ ਇਕ ਵੱਡਾ ਭਾਰੀ ਵਕੀਲ ਹੈ, ਚਾਂਦੀ ਸੋਨੇ ਦਾ ਤਾਂ ਇਸ ਦੇ ਦਰਿਆ ਪਿਆ ਵਗਦਾ ਹੈ, ਅਜ ਇਸ ਦੀ ‘ਬੱਧੀ ਬੱਝਦੀ ਅਤ ਛੱਡੀ ਛੁਟਦੀ ਹੈ।'
ਹੁਣੇ ਕਿਸੇ ਵੇਲੇ ਮੈਂ ਚੁਪੀਤੀ ਹੀ ਤੁਰ ਜਾਵਾਂਗੀ, ਕਿਉਂਕਿ ਤੁਸੀਂ ਖੁਸ਼ੀ ਨਾਲ ਜਾਣ ਨਹੀਂ ਦਿੰਦੇ। ਫ਼ਾਤਮਾ ਬਥੇਰੇ ਜੋਰ ਲਾ ਰਹੀ ਪਰ ‘ਬੱਧੇ ਕਦੀ ਨਾ ਰਹਿ ਸਕੇ ਪੰਛੀ ਤੇ ਦਰਵੇਸ਼' ਸਮਾਂ ਦਾਉ ਜਦ ਫਬ ਗਿਆ, ਨਿਕਲ ਤੁਰੇ ਪਰਦੇਸ।
ਹਰ ਚੀਜ਼ ਵੇਲੇ ਸਿਰ ਹੀ ਚੰਗੀ ਲਗਦੀ ਹੈ । ‘ਬਰਸੇ ਫਾਗਣ ਦੂਣ ਦੁਆਗਣ, ਬਰਸੇ ਚੇਤ ਨਾ ਖਲ ਨਾ ਖੇਤ'।
ਤੂੰ ਬੜਾ ਅਜੀਬ ਬੰਦਾ ਏਂ, ਇੱਥੇ ਤਾਂ ਤੂੰ ਅੱਜ ਆਇਆ ਹੀ ਨਹੀਂ ਤੇ ਪੈਸੇ ਤੇਰੇ ਇੱਥੇ ਕਿਵੇਂ ਆ ਗਏ । ਉਹੇ ਗੱਲ ਹੋਈ ਨਾ, ‘ਬਲਦ ਗਵਾਇਆ ਥੋਰੀਏ, ਮੁੜ ਮੁੜ ਕਿੱਲਾ ਲੋੜੀਏ'।
ਬੁੱਢੀ ਹੱਡੀ ਹੈ, ਪਰ ਸਿਰੜੀ ਏਨਾ ਕਿ ਜਵਾਨਾਂ ਨੂੰ ਪਿੱਛੇ ਸੁਟਦਾ ਹੈ। 'ਬਲਦ ਦੇ ਹੱਡ ਵਗਨ ਤੇ ਸੰਢੇ ਦਾ ਮਾਸ' ਵਾਲੀ ਗੱਲ ਹੈ।
ਬੱਚੀ ! ਮੁੰਡਾ ਮੰਗਣ ਲੱਗਿਆਂ ਤੂੰ ਦੂਰ ਦੀ ਵਿਚਾਰ ਤੋਂ ਕੰਮ ਲਿਆ । ਨਹੀਂ ਤਾਂ ਇਹ ਦੁੱਖ ਨਾ ਹੁੰਦਾ । ਸਿਆਣਿਆਂ ਨੇ ਕਿਹਾ ਹੈ 'ਬਲਦ ਲਈਏ ਲਾਣੇ ਦਾ ਤੇ ਸਾਕ ਲਈਏ ਠਿਕਾਣੇ ਦਾ।'
ਤੁਹਾਡਾ ਕੀ ਖਿਆਲ ਹੈ ਅੰਮ੍ਰਿਤ ਉੱਤੇ ਉਸ ਦੇ ਪਿਉ ਦਾ ਕੋਈ ਅਸਰ ਨਹੀਂ । ਇਹ ਗੱਲ ਤਾਂ ਮੈਂ ਮੰਨ ਹੀ ਨਹੀਂ ਸਕਦਾ ਆਖਿਰ 'ਬਲ੍ਹੇ ਦਾ ਬਲ੍ਹਾ ਨਹੀਂ ਤਾਂ ਮੱਥੇ ਫੁਟੀ ਜ਼ਰੂਰ ਹੁੰਦੀ ਹੈ।
ਸਾਡੇ ਭਾਗ ! ਕਾਕੇ ਨੂੰ ਵਲੈਤ ਵੀ ਘੱਲਿਆ। ਪਰ ‘ਬਾਈ ਬਾਈ ਤੇ ਓਸੇ ਜਾਈ' ਕੋਈ ਉੱਨਤੀ ਉਸਨੇ ਨਹੀਂ ਕੀਤੀ।
‘ਬਾਹਮਣ ਦਾ ਬਾਹਮਣ ਵੈਰੀ' ਵਾਲੀ ਹੀ ਗੱਲ ਹੋਈ ਆਖਿਰ ਨੂੰ। ਉਸਦਾ ਗਲ ਉਸਦੇ ਆਪਣੇ ਜਾਤ ਬਰਾਦਰੀ ਦੇ ਭਰਾਵਾਂ ਨੇ ਹੀ ਕਪ ਦਿੱਤਾ ਤੇ ਬਸ ਫੇਰ ਕੀ ਸੀ... ।
ਕਰਮਾਂ ਦਾ ਹੀ ਫਲ ਮਿਲਣਾ ਸੀ 'ਬਾਹਮਣ ਦੇ ਹੱਥ ਛੁਰਾ ਉਹ ਵੀ ਬੁਰਾ।' ਜੇ ਚੰਗਾ ਮਨੁੱਖ ਮੰਦੇ ਕੰਮ ਕਰੇ, ਤਾਂ ਉਹ ਵੀ ਤਾਂ ਬੁਰਾ ਬਣਨਾ ਹੀ ਹੋਇਆ।
ਆਖਦੇ ਹਨ, ਮੰਗਤਿਆਂ ਕੋਲੋਂ ਮੰਗਣਾ ਲਾਹਨਤੀਆਂ ਦਾ ਕੰਮ । ਕਦੀ ‘ਬਾਹਮਣ ਮੰਗਿਆ ਧਾਈਂ ਠੱਗਿਆ ਪੂਰੀ ਨਹੀਂ ਪੈਂਦੀ।'