ਮੈਨੂੰ ਤਾਂ ਸਮਝ ਨਹੀਂ ਲਗਦੀ ਕਿ ਤੂੰ ਕਿਉਂ ਹਰ ਜਗ੍ਹਾ ਚੌਧਰੀ ਬਣਿਆ ਫਿਰਦਾ ਏਂ । 'ਨਾ ਲਹਿਣਾ, ਨਾ ਦੇਣਾ, ਨਾ ਕਾਰੇ, ਨਾ ਮਸਲੇ' ਤੂੰ ਹਰ ਜਗ੍ਹਾ ਦਖਲ ਨਾ ਦਿਆ ਕਰ।
ਰਾਜ ਕੁਮਾਰ ਬੇਬਸ ਅਤੇ ਬੇ ਪਰਵਾਹ ਐਸੀ ਆਪਦਾ ਵਿਚ ਫਸਿਆ ਕਿ 'ਨਾ ਕਿਤੇ ਨੱਸਣ ਜੋਗਾ, ਨਾ ਕਿਤੇ ਲੁਕਣ ਜੋਗਾ।' ਜ਼ਖਮੀ ਅਤੇ ਬੇਹਥਿਆਰਾ ਹੋਣ ਦੇ ਕਾਰਨ ਲੜਨ ਜੋਗਾ ਵੀ ਨਾ ਰਿਹਾ ।
ਇਨ੍ਹਾਂ ਖੇਡਾਂ ਤੇ ਖਰਚ ਬਹੁਤਾ ਹੁੰਦਾ ਏ ਪਰ ਦੇਸੀ ਖੇਡਾਂ ਤੇ ਖ਼ਰਚ ਕੁਝ ਵੀ ਨਹੀਂ ਹੁੰਦਾ ਅਤੇ ਕਸਰਤ ਦਾ ਲਾਭ ਭੀ ਪੁੱਜ ਜਾਂਦਾ ਹੈ। 'ਨਾਲੇ ਹੱਜ ਨਾਲੇ ਵਣਜ' ਵਾਲਾ ਲੇਖਾ ਬਣ ਜਾਂਦਾ ਹੈ।
ਸਭਦਾਂ-ਹਾਇ ਮਾਂ ਜੀ ! ਤਰਸ ਕਰੋ, 'ਨਾਲੇ ਕੋਹਵੇਂ, ਨਾਲੇ ਰੋਣ ਨਾ ਦੇਵੇਂ।
ਮੈਂ ਤਾਂ ਉਹਨੂੰ ਵੀ ਕਦੀ ਅਲਫੋਂ ਬੇ ਨਹੀਂ ਸੀ ਆਖਿਆ। ਉਸਨੂੰ ਤਾਂ ਐਵੇਂ ਹੀ ਚੰਦਰੀ ਫਿਟਕ ਪਈ ਹੋਈ ਸੀ । 'ਨਾਲੇ ਖਾਂਦੀ ਤੇ ਨਾਲੇ ਘੂਰਦੀ ਸੀ।'
ਫਿਰ 'ਦੋ ਦੋ ਤੇ ਚੋਪੜੀਆਂ' ਤੈਨੂੰ ਕਿੰਨਾ ਕੁ ਚਿਰ ਮਿਲਦੀਆਂ ਰਹਿਣਗੀਆਂ। ਹੁਣ ਕੰਮ ਕਰਕੇ ਖਾਹ । ਬਥੇਰਾ ਨਿਕੰਮੇ ਦਾ ਪੇਟ ਪਾਲਿਆ ।
ਇੱਕ ਜਣਾ ਰਤਾ ਅਗਾਂਹ ਹੋ ਕੇ ਬੋਲਿਆ, ਕੀ ਕਿਹਾ ਈ। ਸ਼ਬਦ ਸੁਨਣ ਆਈ ਸੀ ? ਸਰਦਾਰ ਜੀ, ਇਹ ਪੱਤੇ ਬਾਜ਼ੀਆਂ ਕਿਸੇ ਹੋਰ ਨੂੰ ਜਾ ਕੇ ਦੱਸੋ। 'ਨਾਲੇ ਚੋਰ ਨਾਲੇ ਚਤਰ'।
ਇਸ ਤਰ੍ਹਾਂ ਕੰਮ ਨਹੀਂ ਚੱਲੇਗਾ ਜਾਂ ਤਾਂ ਅਲੱਗ ਹੋ ਤੇ ਆਪਣੇ ਰਸਤੇ ਲੱਗ ਜਾਂ ਫਿਰ ਸਾਡੇ ਕਹਿਣੇ 'ਚ ਰਹਿ। 'ਨਾਲੇ ਚੰਗਾ ਚੋਖਾ ਖਾਣਾ, ਨਾਲੇ ਅੱਖਾਂ ਕੱਢ ਵਿਖਾਣਾ' ਇਹ ਕੰਮ ਇੱਥੇ ਨਹੀਂ ਚਲੇਗਾ।
ਮੈਂ ਭਾਵੇਂ ਇਹ ਭੋਜਨਾਲਾ ਸਿਰਫ ਸੇਵਾ-ਭਾਵ ਦੇ ਖਿਆਲ ਨਾਲ ਹੀ ਖੋਲ੍ਹਿਆ ਸੀ। ਪਰ ਫਿਰ ਭੀ ਮੈਨੂੰ ਇਸ ਵਿੱਚ ਕਾਫੀ ਲਾਭ ਹੋਇਆ । 'ਨਾਲੇ ਪੁੰਨ ਨਾਲੇ ਫਲੀਆਂ'।
ਮਾਸੀ ਜੀ ! ਨਾਲੇ ਪਿਆਰ ਕਰਦੇ ਹੋ ਤੇ ਨਾਲੇ ਤਾਨ੍ਹੇ ਮਾਰਦੇ ਹੋ ? 'ਨਾਲੇ ਮਾਸੀ, ਨਾਲੇ ਚੂੰਢੀਆਂ' ? ਇੱਕ ਗੱਲ ਕਰੋ।
ਜੇ ਹੁਣ ਸ਼ਰਮ ਹੀ ਲਾਹ ਛੱਡੀ ਜੇ ਤਾਂ ਫਿਰ ਰਹਿ ਕੀ ਗਿਆ, ਨਾਲੇ ਮੰਗਣਾ ਨਾਲੇ ਟਿੰਡ ਲੁਕਾਉਣੀ।
ਤੇਰੀ ਸ਼ਾਮਤ ਜਾਪਦੀ ਏ, ਨਾਲੇ ਮੈਨੂੰ ਭੰਡੇ, ਨਾਲੇ ਰੋਹਬ ਦਵੇਂ । 'ਨਾਲੇ ਰਾਹ ਵਿਚ ਹੱਗੇ ਨਾਲੇ ਆਨੇ ਟੱਡੇਂ ? ਤੇਰੀ ਇਹ ਕਰਤੂਤ ਕੌਣ ਸਹਾਰੇਗਾ ?